Mungkan hta amyu langai ngu byin pru wa na hte ngang grin nga na matu gaw ram ram yak la ai re. “Ndai amyu” ni a lamu ga re ngu mungkan kawn, shingyim u hpung kawn masat ya na matu gaw grau yak nga ai. Mungkan (UN) jahpan hku yu yang amyu bawsang hpan langai, ga hpan langai nga tim teng sha mungkan UN kawn masat masa galaw ya ai gaw mungdan (200) jan sha naw re. Tinang mungdan a lamu ga dawnghkawn n lu ai amyu ni hpe gaw Ja-gumhpraw gade lu su tim, hpaji gade chye tim (U hka a U n sawn) Mungdan langai hku kadai n masat ya nga ai.
Manang wa a lamu ga, htunghkring hpe nye a mungdan, nye a htunghkring, nye a ga ngu sa tsun madu la n mai nga ai.
Anhte JW amyu sha ni kaw kadai mung ningdang n lu ai labau hte hkrak re nga ai Jiwoi Jiwa ni nga hkrat wa ai dai lup dai hpang lamu ga nga ai re. Makam su ai, htunghkring lu ai, Laika hte a ga lu da sai. Mungkan ga n'tsa hta "Kachin Land" ngu nna masat let a sak hkrung sa mai nga sai re.
Mungkan uhpung law law kawn hkap la da ai lam hta mungdan langai ngu hpyi na hte n'dau lu na matu gaw, daw kaba masum madung n'pawt nga ra ai. Dai lam ni gaw -
(1) Labau hte hkrak re ai lamu ga jarit nga ra ai.
(2) Masha n-gun (Population) wan mi (1 million), n yawm ai sha nga ra ai.
(3) Yawng a gawng malai (shr) law malawng hkap la ai mung masa hpung (shr) laknak lang ai asuya nga ra ai re. Rai yang, dai ni anhte JW sha ni hta ndai lam yan masum gaw hpring zup taw nga sai ngu mu mada ai. Anhte JW myu sha ni yawng myit hkrum yang "Pang Lung" ga sadi hpe Myen asuya wa n hkap la ai rai jang gaw mungdan mai n’dau ai ahkang nga sai hpe mu lu ai.
 |
| Wunpawng Mungdan gaw-gap la ga!!! |
Anhte a Karai Kasang jaw da ai Wunpawng mungdan "Kachin Land" ngu nna madu mying shing teng la lu na matu 1947 ning kawn kalang, 1949 ning dinghku majan hta kalang, hpu shawng hpu ba ni myit nau san seng nna, myen ningbaw ni hpe nau kam shut ai majaw mungdan lu na matu ahkaw ahkang lahkawng lang sum ngut sai. Masum lang masu katut yang gaw masu hkrum ai wa a mara re sai re. Dai majaw, ndai lang na "Kachin Land" ngu ai Wunpawng Mungdan hpe mungkan kaw dawnghkawn langai lu, rapdaw langai byin wa lu na matu gaw ya byin nga ai dinghku majan hta mung grai seng wa na re sai.
Ndai lang bai anthe JW myu sha ni majan sum ahkaw ahkang sum ai rai yang gaw shaning tsa gahtap nna shanglawt lu na ahkaw ahkang aten na mat mai ai. JW myu sha ni yawng mung KIO/ KIA a ya byin nga ai dinghku majan hta jut shara mi kaw na sha pyi shang lawm jang gaw Karai jaw ai hkanan WP ngu ai “Kachin Land” (JW Mungdan) hpe mungkan rap daw kaw amying shing teng daidaw la (madu lu) na matu gaw ga lahtum n shut re nga sai re…
Laika ka ai - Nu
No comments:
Post a Comment