KNO NINGBAW KABA HTE COUNCIL MALAWM NI HPANG DE

Hkungga ai KNO Ningbaw Kaba hte council malawm ni yawng hpang de ngai Wunpawng Shadang Ramma Langai hku nna ndai laika hte shana lajin dat nngai. KNO kaw nna shabra dat ai ndau laika hpe anhte Jinghpaw mung mare kaba nga Jinghpaw ni malawng maga mu hti saga ai, amyu sha lawt lu lam a matu myit makrun let galaw nga ai lam hpe na lu ai majaw na-chying wa kabu myit dik nga ga ai.

 Ya yang anhte Jinghpaw Wunpawng ni gaw Mu mada ai Satan Hpyen wa a branglang gasat gala ai hkrum nga saga ai, shawng de gaw katsi majan hte anhte hpe gasat lai wa sai. Jinghpaw ramma ni manu mana hkrat sum lai wa sai, ya gaw Asan sha Brang lang masa hku nna (Physical attack) galaw wa mara ai. November 13, 2011 ya shana Myikyina Thidar (Njang Kawng) bawm kapaw ai gaw gadai re hpe san pyi nra yawng chye na sai hpe kam ai. Tinang Jinghpaw Dap ni gaw Mung Shawa hpe hpa majaw gasat na, Mung shawa mun (10000) lam hpe pyi Laiza hte Maija Yang ni kaw lakawn lanawn da nga yang mi, Tinang Jinghpaw dap ni hpe hpa ntsen shara nnga ai, ndai mabyin gaw Myen Satan wa nan shabyin dat ai rai sai. Jinghpaw ni hkrai shanu ai shara hte Jinghpaw Jawngma ni hkrai mahkawng nga ai shara kaw bawm sa kapaw ai gaw Satan myen sha nrai yang kadai rai na? Ndai lam gaw anhte Jinghpaw ni yawng hpe Amyu Sha Majan (Lu Myu-ye Taik-Poi) Hpaw Hpang dat ai lam nan rai sai. Dai majaw anhte Jinghpaw ni yawng gaw tinang a hpyen gaw gara re, gadai re hpe asan sha chye sai re majaw tinang lu lawm lam ni hpe naw kau da nna ya hkyak hkyak hkrum sha nga sai amyu sha majan hta nang ngai yawng lahkrip ra ra hte ya jang shang lawm ra sai. Ndai Satan myen hpe anhte lamu ga kaw na atsai awai gawt kau lu yang she anhpu annau ni jet ai ngwi pyaw simsa lam lu na re. Libya mungdan kaw byin ai mung-shawa majan zawn galaw ra ai, yak hkak ai la ni nga na re, myit n-kaji ga, n-gun da-ting myit nden shaja ga, myit hkrum ga, gasat saga ngu saw lajin dat ai rai.

Rai tim anhte Jinghpaw ni hta Ningbaw law law nra na nhten, anhte yawng a matu KIO/KIA gaw mi 1961 ning kaw nna manu mana arang bang let Jinghpaw Wunpawng amyu sha ni yawng (Kachins from Outside & Inside) a matu shakut nga ai gaw dai ni du hkra rai nga ai. Shawng na ningbaw ningla ni langai lahkawng myit nsu ai lam ni gaw nga lai wa na sai. Rai tim, ya dai ni gaw anhpu annau ni yawng myit hkrum kahkyin gumdin let amyu sha lawt lu lam hta rau sha ta gindun lahkrip ra ra sa wa ra ai aten re. Dai majaw anhte Jinghpaw Wunpawng amyu sha ni hta KIO/KIA gaw yawng a Daw Hpum Daw nu tai ya nga chyalu re majaw kaga wuhpung gaw mahkoi nra na nhten, anhte hta kaja wa ra ahkyak ai gaw greng ai ningbaw kaja she re. Ningbaw law law anhte nra na nhten, Jinghpaw ni yawng a matu Ningbaw Kaba langai sha nga yang grau mai na kun. KIO/KIA hta langai sha pawng gahkyin mat nna rapdaw langai council langai hta ta gindun nna sa wa yang gaw grau mai na nhten ngu mu mada nngai rai. Shut ai lam nga yang mung sharai la marit ngu ngai Wunpawng Shadang langai hku nna mu mada ai lam ndai hte hte shana lajin dat ai rai.